Возачот на Ферари, Луис Хамилтон, изјави дека е оптимист во врска со продолжувањето на сезоната во Формула 1, но дека мора да ги отстрани грешките што го чинеа подобар финиш на Големата награда на Унгарија, како и во претходниот период.
Актуелниот светски шампион, асот на Мекларен, Ландо Норис, триумфираше на Големата награда на Унгарија, 11-та трка од овогодинешното првенство во Формула 1.
Седумкратниот светски шампион ја заврши трката на петтото место, откако доби дополнителна казна од пет секунди за надминување на ограничувањето на брзината во боксот за 0,1 км/ч.
Хамилтон беше казнет за време на неговото последно запирање во боксот за промена на гуми, за која вели дека била непотребна. Потоа Ферари ги повика и него и Шарл Леклер во боксот – иако ова не беше првичниот план – во обид да ги надомести завршните позиции.
„Навистина не мислам дека требаше да го направиме тоa последно влегување во боксот. Одлуката беше донесена непосредно пред да влеземе во боксот и немав време да разговарам за тоа“, изјави Хамилтон за „Скај Спортс“ по трката, додавајќи:
„Мора да се верува во одлуката на тимот, но гледајќи наназад, моите гуми беа во прилично добра состојба. Веројатно ќе ја изгубев позицијата од Макс, но мислам дека можев да го задржам барем третото место. Само што им ја отворивме вратата за да добијам казна на крајот.“
Антонели влегува во летната пауза со 219 бода на врвот на табелата во шампионатот, 50 повеќе од Хамилтон, додека Расел е трет со 160.
„Апсолутно сум оптимист за втората половина од сезоната. Неверојатно сум благодарен на тимот, бидејќи завршија одлична работа во текот на првата половина од сезоната“, рече Хамилтон, додавајќи:
„Не мислам дека моите последни три викенди беа добри, направив многу грешки. Исто така, добив многу казни, па морам да работам навистина напорно за да не им дадам повеќе можности на стјуардите да ме казнуваат.“
Хамилтон е најголемиот ривал на Антонели во борбата за титулата. Ако победи, тоа ќе биде негова осма – рекордна.
„Во борба сме, но трки како оваа можат да не чинат титулата кај возачите.“, порача тој.
Следната трка во Формула 1 е Големата награда на Холандија во Зандворт од 21 до 23 август.
