Најдобриот стрелец на сите времиња на Манчестер Јунајтед, Вејн Руни, отворено проговори за тешката борба со проблемите со менталното здравје низ која поминал за време на неговите играчки денови на „Олд Трафорд“. И покрај тоа што постигна огромни успеси на теренот, поранешниот капитен на Англија призна дека стигнал до точка каде што размислувал да си го одземе животот.
Појавувајќи се во поткастот „Life At The Midpoint with Gabby Logan“, поранешниот напаѓач на Англија објасни дека неговиот приватен живот е во целосна спротивност со неговите постојано добри настапи на теренот. Иако неодамна се ожени и доби син, Каи, неговото најстаро дете, Руни се соочил со сериозни проблеми надвор од фудбалскиот терен.
Во најлошите моменти, тој поминувал два дена пиејќи дома, криејќи се за неговиот син Каи да не го види во таква состојба.
Руни целосно избегнувал јавни места и се чувствувал опуштено само кога бил на фудбалскиот терен.
„Гледајќи наназад, можам да кажам дека бев себичен, но знаев дека поминувам низ нешто со што беше навистина тешко да се справи. Не сакав Каи да види како изгледам во таа состојба, па се криев“, рече Руни.
„Стигнав до точка каде што размислував за самоубиство. Едноставно не сакав да бидам во близина на никого. Не сакав да среќавам луѓе на улица, не сакав да одам во продавници. Секогаш се чувствував безбедно на фудбалскиот терен, но со сè друго беше навистина тешко за справување.“
Најдобриот стрелец на Манчестер Јунајтед на сите времиња се обидуваше да ги скрие своите проблеми за време на неговите најдобри денови како играч со „Црвените ѓаволи“.
„Не сакаш да покажеш никаква слабост, па се обидуваш да ја прикриеш. Иако знаев во што сум, ми беше тешко навистина да го признаам тоа бидејќи чувствував дека тоа ме прави помалку маж“, додаде Руни.
Во обид да разбере што му се случува, Руни се обратил на терапевт, и тоа било во текот на она што требало да биде еден од најсреќните периоди во неговиот живот.
„Разговарав со терапевт за да се обидам да разберам што не е во ред со мене. Кога ќе се осврнам назад, веројатно бев на врвот на мојата кариера, штотуку добив син и штотуку се оженив. Требаше да биде најсреќниот период од мојот живот, но не беше. Всушност, веројатно беше најтешкиот, поради себичните постапки на кои прибегнував“, рече поранешниот фудбалер.
Руни особено истакна колку неговата сопруга, Колин, му помогнала да го преброди тешкиот период.
„Колин ми помогна неизмерно. Можеше да си замине, толку беше лошо, но остана покрај мене и ми помогна да пребродам сè“, рече тој.
Признавањето на проблемот, наместо криењето, му овозможи на Руни да се соочи со она што долго го потиснуваше. Со разговори со терапевт и поддршката од неговата сопруга, Колин, тој успеал да преброди тежок период и да се извлече од изолацијата што ги обележала некои од најтемните моменти од неговиот живот.


