Конечниот список од 26 играчи за Светското првенство од селекторот на Шпанија, Луис Де Ла Фуенте, без ниту еден фудбалер од Реал Мадрид, со осум од Барселона, донесе клупски контроверзии, медиумски напади, а особено дебата, па дури и војна на социјалните мрежи.
Шпанскиот селектор, во духот на Спартанците, веднаш ги прекина сите клупски манипулации.
„Ова е Шпанија. За мене, најдобриот тим е Шпанија, нема друг. Не земам предвид од кој клуб доаѓаат играчите. Важно е да имаме шпански играчи кои се горди што ја претставуваат својата земја. Јас сум единствената личност чија мотивација при донесување одлуки е само спортска, а тоа е да потврдам дека овие 26 играчи се најдобри за мојот тим Шпанија. Ова е репрезентацијата на целата земја“, рече Де Ла Фуенте.
Not a single Real Madrid player has made Spain’s World Cup squad 🇪🇸 pic.twitter.com/j3QANIapkD
— B/R Football (@brfootball) May 25, 2026
Тренерот објасни колку му било тешко што изгубил некои играчи (Карвахал, Мората, Ремиро), но секоја одлука ја донел со многу размислување, анализа и консултации. Микел Мерино, играч на Арсенал, оди на Светското првенство иако долго време не бил на теренот.
„Микел е олицетворение на многу од вредностите што ги поседува овој тим. Ако треба, ќе го носам на грб од дома само за да биде тука. Сè уште треба да го чекам, се опоравува и на Светското првенство пристигнува одморен, желен да игра. Ќе биде во врвна форма за Шпанија“.
Тој не го криеше своето очекување дека Светското првенство во САД, Канада и Мексико ќе биде обележано од Ламин Јамал.
„Ламин е неверојатно возбуден за своето прво Светско првенство, има неопислива желба да покаже сè што знае и да донесе успех на Шпанија. Тој знае дека ова е неговиот момент, а во животот мора да ја искористите можноста бидејќи никогаш не знаете кога ќе дојде следниот. Според мене, тие ги имаат најдобрите играчи во светот на многу позиции и сите заедно можат да му помогнат на Јамал да го даде својот максимум. Се надевам дека ќе можеме да останеме на Светското првенство што е можно подолго“, рече Де Ла Фуенте.
Шпанската репрезентација игра во групата „Х“ на Светското првенство со Зелено’ртските Острови, Саудиска Арабија и Уругвај.
