Федерико Киеза би можел да го напушти Ливерпул ова лето, но неговото враќање во италијанскиот фудбал не оди толку лесно како што се очекуваше. Иако интересот за Комо не се намалува, преговорите би можеле да бидат попречени од високата цена што англиските гиганти ја бараат за италијанскиот репрезентативец.
По две тешки сезони на „Енфилд“, обележани со повреди и скромни минути, Киеза е се поблиску до одлуката да бара нова средина. Крилниот напаѓач пристигна во Ливерпул од Јувентус како големо засилување, но не успеа да остави длабока трага. Одигра само 50 натпревари за англискиот клуб, додека беше стартер само девет пати.
Комо е сериозно заинтересиран за неговите услуги, клуб кој сака дополнително да го зајакне тимот по пласманот во Лигата на шампионите. Сепак, претседателот на клубот посочи дека финансиските барања на Ливерпул би можеле да претставуваат непремостлива пречка.
„Следиме голем број играчи, но некои трансфери ги надминуваат финансиските рамки што ги планиравме“, рече првиот човек на италијанскиот клуб.
Самиот Киеза не крие дека ќе разговара со раководството и новиот тренер Андони Ираола за неговата иднина во текот на летото. Италијанецот смета дека му е потребен континуитетот што не успеа да го добие во Ливерпул.
„Ако немам поголема улога во Премиер лигата, ќе морам да разгледам други опции. Во првите две години играв многу малку и време е да донесам одлука за следниот чекор во мојата кариера“, рече Киеза.
Тој додаде дека нема поплаки за клубот и дека соработката со Ливерпул останала фер и покрај ограничената минутажа.
Во меѓувреме, се очекуваат големи промени на „Енфилд“. Новиот тренер Андони Ираола планира реконструкција на тимот, додека заминувањата на неколку важни играчи веќе се потврдени. Во таква ситуација, останува да се види дали Киеза ќе добие нова шанса во Ливерпул или ќе ја продолжи кариерата во својата татковина.
