Четири победи во четири натпревари е билансот на португалската фудбалска репрезентација во овој циклус од Лигата на нации А, во кој селекцијата на Жорже Жесус двапати ја победи Норвешка, а по еднаш против Данска и Велс.
И по второто коло и победата во Осло над Норвежаните, во таборот на националниот тим се случија бурни настани. Против Норвешка, за прв пат по 18 години, Кристијано Роналдо не одигра ниту една минута за репрезентацијата, го гледаше натпреварот од клупата, и не доби шанса иако се загреваше половина час.
Ова ја налути португалската ѕвезда. Роналдо ја напушти репрезентацијата пред натпреварот со Данска во Копенхаген, што предизвика лавина од настани. Без Кристијано, Португалија ја победи Данска претходниот четврток (4:2), а потоа синоќа во Порто, во вториот натпревар, беа подобри од Норвешка (2:1).
Роналдо вчера во текот на денот летна од Мадрид за Ријад, а неговото заминување од репрезентацијата е главна тема во спортските медиуми со денови. Селекторот, Жорже Жесус, изјави дека нема да се извинува на никого, а синоќа се огласи и претседателот на Португалската федерација, Педро Проенса, велејќи дека Роналдо ќе се врати во репрезентацијата, доколку сака.
„Нема да објаснувам што се случи. Ова се сосема нормални разговори меѓу тренерот и играчите. Ова е прашање за професионалниот тим и претседателот на Федерацијата не се меша во тоа. Зборуваме за најдобриот играч на сите времиња, играч кој даде повеќе од две децении на португалскиот фудбал. Кристијано Роналдо денес претставува најголем симбол на португалскиот идентитет и ние мора да му оддадеме почит“, рече Проенса.
Нагласи дека Роналдо секогаш ќе биде дел од националниот тим.
🚨🗣️ Pedro Proença, presidente de la Federación Portuguesa de Fútbol:
Cristiano Ronaldo es un símbolo portugués, un jugador excepcional que podría haber terminado su carrera en la Copa del Mundo, pero no quiso hacerlo por el amor que siente por su selección.
Y yo soy testigo de la relación que une a Cristiano con el pueblo portugués y con nuestra selección
— Arielipillo (@ArielipilloPlus) October 4, 2026
„Тој е во националниот тим благодарение на неговиот спортски квалитет и тоа мора да биде апсолутно несомнено. Тој секогаш ќе биде дел од оваа група сè додека има спортски квалитет да игра. Кристијано го знае тоа, знае дека ние така размислуваме. Што се однесува до конкретниот случај, можам само да кажам дека се соочуваме со недоразбирање кое мора да се реши интерно“, додаде Проенса.
Зборуваше и за ставот на соиграчите кон Роналдо.
„Играчите ја покажаа таа нераскинлива врска со нашиот сегашен капитен. Роналдо е дел од нашата репрезентација. Тој беше капитен во првиот од овие четири натпревари, а тренерот Жесус неодамна изјави дека смета на Кристијано ако е физички подготвен. Истото важи и за сите играчи. Роналдо е португалска икона, апсолутно извонреден играч кој можеше да ја заврши кариерата на Светското првенство, но не сакаше поради љубовта кон репрезентацијата. Јас сум сведок на односот што Роналдо го има со португалскиот народ и нашата репрезентација“, рече Проенса.
Тој објасни зошто не проговорил во последните денови.
„Важно беше мирно да ги завршиме овие четири натпревари, бидејќи спортскиот аспект нè водеше. Ќе имаме време и мир сите да седнеме и да го решиме она што е само недоразбирање. Повторувам: Кристијано Роналдо е дел од нашето наследство и секогаш ќе биде тука, ако селекторот го сака. Секако, ова не е куќа без правила. Вакви работи се случуваат во рамките на работна група. ФПФ мирно ги решава ситуациите интерно. За среќа, постои многу силна врска помеѓу Роналдо и Жесус. Јас сум сведок на ова, бидејќи во спротивно, да бидеме сосема јасни – можеби Роналдо би ја напуштил репрезентацијата. Тој не го прави тоа поради тој однос и меѓусебно почитување. Сè што ќе се случи во следните денови ќе биде во знакот на мирот, разговорот и дискусијата. Она што го сакаме е повторно да бидеме заедно во ноември“, заклучи Проенса.
