Европската фудбалска федерација (УЕФА) ги објави официјалните измени во системот на натпреварување во Лигата на нации, кои ќе стапат на сила во транзицискиот период меѓу сезоните 2026/27 и 2028/29.
Најважната новост е преминот од досегашниот формат од четири лиги на нов систем со три лиги (А, Б и Ц), при што секоја лига во изданието 2028/29 ќе брои по 18 репрезентации, а во групната фаза ќе се играат 6 кола.
Најнискиот ранг на натпреварување, Лигата Д, целосно се укинува. Според официјалната одлука на УЕФА, сите шест репрезентации што ќе настапуваат во Лигата Д во текот на сезоната 2026/27 ќе бидат автоматски промовирани во Лигата Ц за сезоната 2028/29.
Елитната Лига А се проширува од 16 на 18 екипи. Место во Лигата А за сезоната 2028/29 ќе обезбедат:
8-те четвртфиналисти од сезоната 2026/27;
2-те најдобри третопласирани екипи од групите во Лигата А;
4-те победници на групите од Лигата Б (директна промоција);
4-те победници од плејофот меѓу Лигата А и Лигата Б.
Двете најслаби четвртопласирани екипи од Лигата А директно испаѓаат во Лигата Б. Во плејофот за опстанок/влез во Лигата А ќе играат двата најслаби третопласирани тима и двата најдобри четвртопласирани тима од Лигата А против четирите другопласирани екипи од Лигата Б.
Лигата Б во новиот циклус исто така ќе обединува 18 репрезентации, а ќе ја сочинуваат двата најслаби четвртопласирани тима од Лигата А, четирите поразени тима од плејофот А/Б, четирите третопласирани тима од Лигата Б, четирите победници на групите во Лигата Ц и четирите победници од плејофот Б/Ц.
Во плејофот меѓу Лигата Б и Ц, силите ќе ги одмерат четирите четвртопласирани тима од Лигата Б и четирите другопласирани тима од Лигата Ц.
Последниот ранг, Лигата Ц, во сезоната 2028/29 ќе се состои од четири поразени тима од плејофот Б/Ц, осум екипи кои ќе завршат на третото и четвртото место во Лигата Ц во текот на сезоната 2026/27, како и шест репрезентации кои доаѓаат од укинатата Лига Д.
Македонија оваа сезона е дел од групата Б1 заедно со селекциите на Шкотска, Швајцарија и Словенија.
