Карлос Алкараз е надвор од терените четири месеци поради повреда, откако веќе ги пропушти Ролан Гарос и Вимблдон, и никој не е спремен да каже дали ќе игра на Отвореното првенство на САД, последниот Гренд слем во сезоната.
Џани Даниеле, претседател на Медицинската комисија на Италијанската тениска федерација, сугерираше дека проблемите на Шпанецот би можеле да произлезат од ментална нестабилност, алудирајќи на можна депресија.
Во интервју за италијанскиот весник „Ла Република“, на прашањето кој случај на повреда е позагрижувачки – повредата на зглобот на Алкараз или повредата на коленото на Јаник Синер, Даниеле се фокусираше на ситуацијата со шпанскиот тенисер.
Италијанскиот доктор ја истакна неизвесноста околу физичката повреда на поранешниот светски број 1. „Во Шпанија, не е точно јасно каква повреда има Карлос на зглобот. Сега се шпекулира за некаков вид ментална нестабилност“, рече тој.
Според Џани Даниеле, Алкараз можеби има тешкотии да ја врати својата најдобра форма, што го довело во „еден вид депресија, маѓепсан круг што го спречува да ја врати самодовербата“.
Претседателот на медицинската комисија додаде дека „сомнежите почнуваат да преовладуваат“, изразувајќи жалење за состојбата на спортистот.
