Ред Бул сака да го задржи Макс Верстапен во своите редови и затоа подготвува нов договор со значително зголемување на платата, објавуваат германските медиуми.
Четирикратниот светски шампион моментално има важечки договор до крајот на 2028 година, но во последните месеци често се поврзуваше со трансфер во Мерцедес, Астон Мартин и Мекларен, додека некои медиуми ја споменаа и можноста за едногодишна пауза во кариерата.
Холандскиот возач моментално го зазема шестото место во генералниот пласман со 109 поени и сè уште не забележал ниту една победа оваа сезона. И покрај ова, тој четири пати бил на подиумот – во Канада, Австрија, Белгија и Унгарија.
Според „Билд“, Ред Бул сака да ја продолжи соработката со 28-годишниот возач за уште една сезона, а воедно да ја отстрани клаузулата за отказ што би можела да се активира ако не ја заврши сезоната меѓу првите двајца во шампионатот.
Тимот наводно е подготвен да му понуди на Верстапен значително повисока плата од неговата моментална, која се проценува на околу 65 милиони евра годишно.
Сепак, најголемиот предизвик за Ред Бул останува конкурентноста на автомобилот. По заминувањето на неколку клучни експерти од техничкиот оддел, тимот не успеа да развие автомобил кој редовно може да се бори за победи, што би можело да игра важна улога во одлуката на Верстапен да ја продолжи кариерата.
Засега, холандскиот возач не брза да донесе конечна одлука и, според медиумските извештаи, сака да почека понатамошен развој на настаните пред да одлучи каде ќе ја продолжи кариерата.
