Никола Јокиќ ги предводеше Денвер Нагетс до голем пресврт и победа од 141-135 над Њу Орлеанс Пеликанс во продолжението, но она што привлече најголемо внимание по натпреварот беше неговата порака до навивачите кои го исвиркуваа домашниот тим за време на лошото прво полувреме.
Денвер заостануваше со дури 23 поени во втората четвртина и на полувремето влезе со негатива од 16 поени, 73-57. Сепак, предводени од српскиот центар, Нагетс успеаја да го свртат натпреварот и да победат во продолжението.
„Во првиот натпревар на нашиот терен, навивачите нè исвиркуваа. Не мислам дека оние кои го направија тоа треба повеќе да доаѓаат. Ако нè следите, знаете дека никогаш не се откажуваме и дека сме се вратиле од многу потешки ситуации. Ако се прашам себеси, тие повеќе не се добредојдени“, рече Јокиќ на прес-конференцијата по натпреварот.
Јокиќ го заврши натпреварот со 35 поени, 15 скока и 10 асистенции. Тој постигна осум поени во продолжението, а го забележа и својот 199-ти „трипл-дабл“ во регуларната сезона на НБА. Пред него е само Расел Вестбрук, кој ја заврши кариерата со 209 вакви настапи.
Јокиќ имаше одлична поддршка во Џамал Мареј, кој постигна 42 поени, додека дебитантот Тревон Брејзил додаде 17, од кои седум во продолжението. Брејзил постигна тројка на една минута и 25 секунди до крајот на продолжението за да му донесе на Денвер водство од 133-129.
Нагетси влегоа во натпреварот ослабени, без Кам Џонсон и Алфа Дијало, додека Џулијан Стротер и Спенсер Џонс сè уште се надвор од игра.
