Не е постигнат договор меѓу раководството на АБА лигата и судиите, нова средба е закажана за пладне. До пладне, судиите треба да се изјаснат дали ги прифаќаат условите што им ги понуди Претседателството на регионалното натпреварување.
Претседателството на АБА лигата и 63-те судии кои досега суделе натпревари во тоа натпреварување не успеаја да најдат заедничко решение.
Преговорите се водеа преку видеоконференција, но без конкретен напредок.
На состанокот присуствуваа членовите на претседателството на АБА лигата Остоја Мијаиловиќ (Партизан), Драган Бокан (Будуќност) и Давор Ужбинец (Цедевита Олимпија), претставници на Црвена звезда и Морнар, како и директорот на АБА лигата Дубравко Кметовиќ.
Од друга страна, имаше претставници на судиите од Србија, Хрватска, Словенија, Босна и Херцеговина и Црна Гора, заедно со нивната адвокатка Данијела Папак.
Поголемиот дел од дискусијата го водеа Мијаиловиќ и Бокан, додека директорот на АБА лигата Кметовиќ ги презентираше економските причини зошто, според него, лигата не може да ги исполни барањата на судиите.
Судиите понудија одреден компромис и изразија желба да учествуваат во развојот на прописите поврзани со нивниот статус и однесување.
Лигата нема ништо против судиите да основаат сопствена организација или здружение кое би ги застапувало нивните интереси.
Сепак, раководството на АБА лигата не се согласува со зголемување на надоместоците за повеќе од 12 проценти.
Истиот процент беше понуден во неодамнешниот јавен повик за судии, кој заврши без доволен број судии да се пријават за почеток на натпреварувањето.
