Пеле Ларсон од 44-ти избор на драфтот за само две сезони поминати на терените во НБА успеа да „искамчи“ договор вреден 60 милиони долари.
Мајами Хит и 25-годишниот шведски бек се согласија за четиригодишно продолжување на соработката, со взаемна опција за сезоната 2030/31. Договорот сè уште не е формално финализиран, но двете страни постигнаа договор.
Ларсон направи голем чекор напред минатата сезона и стана важен дел од ротацијата на Мајами. Во 70 натпревари, од кои 54 беше стартер, тој имаше просек од 11,4 поени, 3,5 скока и 3,4 асистенции за нешто повеќе од 26 минути на теренот.
Тој пристигна во НБА во 2024 година како 44-ти избор, а Мајами го донесе преку размена истата вечер. Во својата втора сезона, тој заработи сериозно место во тимот и довербата на тренерскиот персонал.
Неговата улога сега би можела да биде уште поголема.
„Жешките“ го потпишаа Јанис Антетокунмпо од Милвоки Бакс ова лето, но во тој процес загубија четири играчи од ротацијата. Тоа отвора повеќе простор за Ларсон, кој ќе мора да преземе поголема одговорност како стрелец и плејмејкер следната сезона.
Присуството на Антетокунмпо треба да му даде и повеќе отворени шутеви однадвор, а неговото шутирање за три поени е област што ќе треба да ја подобри.
Ларсон шутираше 32,3 проценти од тројка минатата сезона со 2,7 обиди по натпревар, но тој покажа во текот на својата НБА кариера дека може да ја прошири својата игра од сезона во сезона.
Неговите настапи за шведската репрезентација ова лето беа добар показател за неговиот напредок.
Во четири квалификациски мечеви за Светското првенство, тој постигна просек од 26 поени, покажувајќи дека може да преземе многу поголема офанзивна одговорност отколку што имаше во Мајами досега.
„Хит“ сега јасно покажаа дека сметаат на Ларсон за годините што доаѓаат.
