Новак Ѓоковиќ не успеа да се пласира во четвртфиналето на турнирот во Базел, откако беше поразен од Јан-Ленард Штруф во три сета по голема борба. Германскиот тенисер на тој начин го победи српскиот ас за прв пат во осум дуели, а поразот дополнително ја искомплицира борбата на Ѓоковиќ за место на финалниот Мастерс во Торино.
Ѓоковиќ не го криеше разочарувањето по натпреварот, но призна дека Штруф играл на исклучително високо ниво во клучните моменти. Три последователни грешки на двоен сервис на крајот од вториот сет не биле, според него, одлучувачки.
„Не мислам дека тие три двојни сервис грешки беа одлучувачки фактор. Кога имав брејк-топки, во вториот сет, а исто така и на почетокот на третиот, тој одигра неколку неверојатни поени. Можеби имаше еден или два поени каде што можев да бидам поагресивен, но целата заслуга му припаѓа нему. Поразот ме боли. Тој едноставно одигра неверојатен тенис. Не се сеќавам дека играв против некој што беше толку агресивен и прецизен. Тоа беше еден од тие натпревари“, рече Ѓоковиќ.
Српскиот тенисер сега се соочува со турнир во Париз, каде што ќе се обиде да го подобри својот баланс на поени и да ги задржи шансите за квалификација во Торино. По исцрпувачкиот дуел, Ѓоковиќ рече дека му треба време да се опорави од шокот, но се надева на подобар настап во француската престолнина.
„Тукушто излегов од теренот и сè уште сум разочаран. Ќе размислувам за Париз во следните неколку дена и се надевам дека ќе можам да играм подобро таму“, рече Ѓоковиќ.
Тој, исто така, привлече внимание затоа што не им се обрати на српските новинари на својот мајчин јазик по прес-конференцијата, што е невообичаено за тенисер кој генерално наоѓал време за домашните медиуми во текот на целата своја кариера, без оглед на резултатот. Овој пат, тој одлучи да го прескокне тој дел од своите медиумски обврски по неговиот болен пораз во Базел.
