Искусниот репрезентативец Џовани Ди Лоренцо инсистира дека навивачите и медиумите мора да бидат трпеливи со италијанската репрезентација по нивниот пораз од 2-0 од Белгија. „Ако повторно почнеме да ги расцепуваме „азурите“, тоа нема да помогне“, рече дефанзивецот, кој го започна натпреварот.
„Секако не е убаво да се остави теренот со свирежи на навивачите, но мора да ги прифатиме“, истакна 33-годишниот играч на Наполи за RAI Sport и додаде:
„Тимот се обиде да даде сè од себе. Штета е бидејќи сакавме добро да започнеме во групата и знаеме дека мора да се подобриме. Бевме доста напнати на почетокот, но како што одминуваше натпреварот, нашата игра се подобруваше. Тие имаат одлични индивидуалци и денес ја искористија секоја грешка што ја направивме. Штета е бидејќи кога го примивме вториот гол игравме подобро и имавме шанси да израмниме. Ќе мора да градиме врз позитивните работи што ги видовме. Ова е правилниот начин и знаеме што сака тренерот – да види позитивен и храбар тим. Ова е првиот од четирите натпревари за две недели. Направивме некои грешки, но од сега па натаму ќе се справиме подобро.“
Се чини дека постои психолошка бариера во италијанскиот тим по толку многу разочарувања и играчите се под стрес.
„Настапот не беше ужасен, понекогаш ја презедовме контролата, но натпреварите брзо се менуваат. Ова е нова ера, со нови лица кои можат да прават грешки во своите први натпревари. Се надеваме дека ќе бидеме конкурентни што е можно поскоро. Исто така, мислам дека има проблем со самодовербата, која можеме да ја подобриме само со резултати против големи тимови. Ќе дадеме сè од себе“, е убеден Ди Лоренцо.
Кевин Де Бруин импресионираше за Белгија, а Ди Лоренцо го познава добро од времето заедно во Наполи: „Тој е феноменален играч и имам среќа да го гледам на тренинг секој ден. Тој одигра одличен натпревар вечерва, за жал за нас, но неговиот квалитет е несомнен.“
