Поранешната бразилска фудбалска ѕвезда Роналдињо и неговиот инвестициски фонд се заинтересирани да го преземат кошаркарскиот клуб Монако, кој е во сериозни финансиски проблеми. Информацијата ја објави францускиот L’Équipe, а доаѓа во време кога иднината на клубот од Кнежевството е целосно неизвесна.
Монако минува низ една од најтешките финансиски кризи во својата историја. Долговите беа проценети на 24 милиони евра во јуни, а клубот веќе се соочуваше со последици во текот на сезоната бидејќи не ги подмири своите обврски кон агентите и соработниците. Поради ова, му беа изречени и спортски санкции. Ситуацијата кулминираше ова лето кога клубот беше исклучен од сите француски професионални натпреварувања за сезоната 2026/27 бидејќи не успеа да ги обезбеди потребните финансиски гаранции за продолжување на работењето.
Во потрагата по нов капитал за спасување на клубот, се појави вест за интересот на Роналдињо. Според достапните информации, неговиот инвестициски фонд наводно веќе ги обезбедил парите за преземање и има добри односи со властите во Монако.
Доколку оваа операција се реализира, тоа би бил едно од најнеобичните влегувања на голема фудбалска ѕвезда во светот на кошарката. Засега нема официјална потврда, а исходот треба да биде познат наскоро. Бразилецот, сепак, не е единствениот потенцијален купувач, бидејќи има уште неколку заинтересирани инвеститори за клубот.
Целиот процес е дополнително условен од краток рок. Имено, постапката за преземање мора да биде завршена пред Францускиот олимписки комитет (CNOSF) најдоцна до 19 август. И покрај фактот што Монако се етаблираше во последните години како еден од најсилните француски клубови и редовен учесник во Евролигата, проблемите надвор од теренот го доведоа во ситуација каде што неговиот опстанок е загрозен.
