Енди Мареј остро ги негираше тврдењата дека заработувал 100.000 долари неделно додека работел со Новак Ѓоковиќ. Поранешниот број еден неодамна се врати на тренерската работа и се приклучи на тимот на Џек Дрејпер за сезоната на тревна подлога, а веднаш потоа се појавија информации за наводните огромни суми што му биле исплатени додека работел со Ѓоковиќ.
На социјалните мрежи беше објавено дека Мареј добивал 100.000 долари неделно од Новак, цитирајќи го францускиот новинар Фредерик Вердие.
Шкотланѓанецот не чекаше долго да реагира.
„Прочитав неколку лаги низ годините, но оваа дефинитивно е во првите 5“, напиша Мареј во коментар под објавата.
Мареј ја започна својата тренерска кариера во ноември 2024 година, кога се приклучи на тимот на Ѓоковиќ во соработка што привлече огромно внимание од тениската јавност.
Сепак, нивната заедничка работа траеше само шест месеци, а Мареј сега е со Дрејпер, кој се обидува да се врати во форма пред Вимблдон по проблемите со повредата на коленото.
