Фудбалот постојано се менува, веројатно е играта што ги променила најмногу правилата од своето основање, а сега се спроведува нова револуција.
Романската фудбалска федерација (РФР) одлучи да воведе сосема ново правило за заштита на децата од навреди, притисок и насилно однесување за време на младинските натпревари.
Во романскиот фудбал ќе се појави „црниот картон“, но тој, за разлика од жолтиот и црвениот, нема да биде наменет за играчите. Целта ќе бидат родителите и другите гледачи на трибините кои се однесуваат несоодветно.
Новите правила биле одобрени на 11 септември и ќе стапат на сила веднаш, а ќе се применуваат на натпреварите во помладите категории од У7 до У16.
Романската фудбалска федерација тврди дека ова е нов механизам во фудбалот, чија главна цел е да им овозможи на децата да играат во средина без навреди, заплашување и непотребен притисок од возрасните.
Црниот картон нема да функционира на ист начин како жолтиот или црвениот картон. Судијата нема да им го покаже на фудбалерите, туку ќе го користи за да реагира на сериозно несоодветно однесување на родителите, членовите на семејството и другите гледачи.
Предвиден е протокол од три чекори: Судијата прво привремено ќе ја запре играта и ќе побара од тренерите да се обидат да ги смират навивачите.
Доколку инцидентите продолжат, натпреварот ќе биде прекинат десет минути, а двата тима ќе одат во соблекувалните.
Доколку ситуацијата не се смири дури и по враќањето на теренот, судијата ќе покаже црн картон и дефинитивно ќе ја запре играта.
Дисциплинските органи на Романската фудбалска асоцијација ќе одлучат за можни дополнителни санкции доколку се потребни.
Особено е интересно што новите правила не важат само за конфликти со противниците, тренерите или судиите. ФРФ сака да спречи и несоодветно однесување на родителите кон сопствените деца.
Причината за активирање на протоколот може да биде навредување, удирање или туркање на сопственото дете, членови на тренерскиот штаб, противнички играчи или тренери.
Списокот на прекршоци вклучува и постојани вербални напади врз судиите, како и вербални или физички конфликти меѓу родителите и другите гледачи.
На овој начин, Романската фудбалска асоцијација се обидува да создаде побезбедна средина за најмладите фудбалери и да спречи однесувањето на возрасните од трибините да влијае врз децата кои пред сè треба да уживаат во фудбалот на теренот.
