Селекторот на Португалија, Роберто Мартинез ги отфрли споредбите на Кристијано Роналдо со Лионел Меси и Ерлинг Халанд како „детски“, бранејќи ја одлуката 41-годишниот капитен да игра секоја минута од групната фаза на Светското првенство. Искусниот напаѓач досега не пропуштил ниту една минута на турнирот, вклучувајќи го и ремито 0-0 со Колумбија, кое ѝ го обезбеди на Португалија второто место во Групата К и осминафинале против Хрватска.
Додека Аргентина и Норвешка одлучија да ги одморат Лионел Меси и Ерлинг Халанд пред нокаут фазата, Роберто Мартинез не размислува за таков пристап со Кристијано Роналдо. Селекторот на Португалија инсистира дека би било „детски“ да ги споредува физичките потреби на својот капитен со другите и е уверен дека 41-годишниот офанзивен фудбалер е „ментално и физички“ подготвен да го предводи нападот без одмор. Роналдо ги одигра сите 270 минути во групната фаза.
Обраќајќи се на медиумите во Мајами Гарденс, Мартинез ги отфрли прашањата зошто Роналдо не бил ротиран. „Не правиме споредби со играчи од други национални тимови. Тоа би било детски“, рече шпанскиот стручњак. „Кристијано е навикнат да биде на вистинското место во вистинско време. Повеќе станува збор за ментална сила, тактичка дисциплина и постојано отворање простор во нашите напади“.
Тренерот објасни дека при изборот на состав се води од индивидуални податоци, а не од надворешни приказни. „Не е проблем за Кристијано да игра 90 минути, но можеби во следниот натпревар ќе мора да направиме промена, но тоа важи за секој играч. Досега користевме 21 играч на теренот, па затоа ги распределуваме минутите“, додаде Мартинез.
Иако Португалија направи неколку тактички промени за време на нерешениот натпревар со Колумбија, Роналдо остана на теренот во текот на целиот натпревар. Мартинез истакна дека другите позиции на теренот бараат почести ротации поради специфични физички барања. За португалскиот тренерски штаб, одлуката за тоа кој игра, а кој е на клупата се базира на наука. Мартинез ја нагласи важноста на внатрешните мерења.
„Имаме некои играчи кои не се целосно во форма, а сите податоци што ги собираме се исклучително важни при донесувањето такви одлуки“, истакна тој.
Ремито против Колумбија значи дека Португалија сега мора да се подготви за натпревар против Хрватска, кој ќе се игра овој четврток во Торонто. Бидејќи не ја освои групата, Португалија би можела да се соочи со победникот на Евро 2024, Шпанија, во следната рунда. Сепак, Мартинез е фокусиран на развој на својот тим пред клучните натпревари.
„Сега е време да се адаптираме, да се подобриме и да ги насочиме натпреварите онака како што сакаме, со повеќе посед на топката и подобра контрола“, објасни тој. „Тоа е дел од Светското првенство и тактиката. Како што реков, ни беа потребни овие три натпревари за да го достигнеме нашето најдобро ниво. Ова беше многу корисен натпревар. Сакаме да одиграме осум натпревари на овој турнир, а сега започнува сосема поинакво натпреварување.“
