Селекторот на белгиската репрезентација, Руди Гарсија, ги повика своите играчи да останат смирени бидејќи сè уште не освоиле ништо, само ја поминале групната фаза на Светското првенство. „Црвените ѓаволи“ го победија Нов Зеланд со 5-1 и завршија на врвот во Групата Г на Северноамериканскиот турнир.
„Сè уште не сме освоиле ништо, но поминавме во следната фаза, фала му на Бога што имавме четири гола разлика и тоа ни даде можност да бидеме први. Се развиваме и добиваме моментум, а тоа е добро. Ќе видиме против кого ќе играме во осминафиналето, но ќе уживаме во оваа прва победа“, изјави Гарсија за медиумите.
Напаѓачот Ромелу Лукаку беше оставен на клупата, додека крилниот напаѓач Џереми Доку се врати во почетниот состав откако се опорави од болест и кратко отсуство по раѓањето на неговиот син.
На прашањето дали критиките кон поискусните играчи во тимот се мотивација, Гарсија одговори: „Не, не сум го прочитал тоа, но тоа не е извор на мотивација во Франција или Белгија“.
Стручњакот е категоричен дека има доверба во своите играчи.
„Верувам во нив и затоа мојот тим е таков каков што е во моментов. Имам целосна доверба во лидерите и само едно нешто можеме да направиме. Тоа всушност се случува на теренот и одговорот беше токму таму. Немам што друго да кажам“, додаде Руди Гарсија.
