Новото засилување Марк Кукуреља го одржа својот прв тренинг како играч на Реал Мадрид, а откако заврши, левиот бек ги сподели своите чувства на клупската телевизија.
„Многу сум среќен. Чекав долго време, помина доста време, но сега сум тука. Денес тренирав со моите соиграчи, ги запознав сите и едвај чекам малку по малку да ги запознаам подобро. Се надевам дека ќе биде одлична година. Голема гордост е. Не мислам дека многу луѓе можат да кажат дека го носеле овој дрес. Видовме големи легенди, ова е клуб со огромна историја, најголемата во Европа. Да се биде тука денес е привилегија, чест и пред сè награда за сите напори што морав да ги направам во мојата кариера.
Сè е многу добро. Едвај чекав да ги запознаам. Разговарав со некои од момците што ми пишаа. Пречекот беше многу добар. Беше тежок и долг ден, но влегувам во ритам и тренирам малку по малку, бидејќи најдоброто допрва доаѓа“, сподели тој.
За Мурињо вели: „Ми дава многу самодоверба и ме тера да се чувствувам природно. Мора да направиме што можеме на теренот и, пред сè, да уживаме. Мислам дека сите сакаме истото – да победиме и да имаме одлична година.“
За повикот од Реал Мадрид: „Како играч, како дете кое почнува да игра фудбал, многу е тешко да се одбие можноста да се игра за ваков клуб. Кога се појави можноста, не се двоумев ниту за момент. Како гледач, ги видов сите тие магични ноќи, тие пресврти на „Бернабеу“, сите освоени трофеи од Лигата на шампионите. Да се има шанса да се доживее ова од прва рака и да се биде дел од него е огромна одговорност, но и многу убав и важен предизвик.“
„Едвај чекам да го одиграм мојот прв домашен натпревар и да се сретнам со навивачите. Дојдов на „Бернабеу“ како гостин, играв и натпревар со репрезентацијата, но да го доживеам тоа како домашен тим… Да ја слушнам химната, навивачите кога ќе пристигне автобусот, што го видов во некои документарци и е импресивно на големите натпревари. Сето ова е нешто многу убаво и остава спомени за цел живот.“, додаде тој.
