Реал Мадрид ќе го реконструира својот играчки кадар во текот на летото, но како што стојат работите, ќе почнат да бараат и нов тренер.
Серхио Скариоло се најде на „тенок мраз“ со раководството на клубот, што е логично, бидејќи тимот остана без ниту еден трофеј во претходната сезона, иако играше во три финалиња (шпански Суперкуп, Куп и Евролига).
Шпанските медиуми, и тоа не било какви, туку мадридска „Марка“, традиционално добро информирана за ситуацијата во двата мадридски тима (кошарка и фудбал), тврди дека не само што клубот одлучил да се раздели со Италијанецот, туку наведува и дека Реал веќе има список на наследници на Скариоло.
Меѓу нив се Ергин Атаман и Јанис Сферопулос, но и Велимир Перасовиќ, кој, како и споменатите двајца, моментално е без договор откако го напушти Уникс по пет сезони. Хрватскиот тренер наводно веќе е на пат кон Виторија, каде што би ја презел Басконија по четврти пат во кариерата, но повик од повисока кошаркарска позиција, би можел да го принуди да ја промени својата рута на патување од Русија.
Во секој случај, многу работи ќе станат појасни околу тренерската позиција во Реал Мадрид по средбата меѓу кошаркарскиот директор Хуан Карлос Санчез и Скариоло, на која, според Шпанците, тие само се ракувале и си тргнале по различни патишта.
Вреди да се напомене дека Скариоло е сè уште под договор со Реал Мадрид, па затоа оваа разделба би можела многу да го чини Мадрид.
„Бараниот тренер треба да биде достапен (без договор) или да има разумна клаузула за откуп во договорот. Меѓу тренерите кои имаат значителен углед се Ергин Атаман, Јанис Сферопулос и Велимир Перасовиќ, кој неодамна го напушти Уникс Казан и чие име веќе се поврзува со Басконија“, се наведува, меѓу другото, во текстот од мадридска „Марка“.
